Tsansa ni Inday Mirriam
by Ulysses Viriña Espartero
22 Hulyo 2012
Kun si Inday Mirriam
ang pangulo ta …
wara’t makapugong
sa Punong Mahistrado
nga magbuhi kang TRO
pasensya lang ang madutlan,
mabuklan lang ang maigo!
wara’t makahuruhutik
wara’t makapanihol-nihol
sa plenaryo kang senado
ang magbuka kang baba,
pukpokon sa ulo!
Kun si Inday Mirriam
ang pasugtan …
madayon
ang pagtulod ni Mike Arroyo
kang wheelchair ni Gloria
pasaka sa eroplano
bitbit ang mga handom
kag dumot
kang tagsa ka Pilipino …
Kun si Inday Mirriam
ang magwaros …
masadya, nagakirnadlaw
ang mga tawo
maskin wara’t sulod
ang taragbasan, koron kag kaldero …
magatutok sa telebisyon kag radyo
magabasa kang dyaryo
magabukas kang internet
ay abaw, daw ano kaaram gali ang mga Pilipino!
Kun si Inday Mirriam
ang mataw-an kang kahigayunan …
bilog nga kalibutan
magatangra sa Pilipinas
may paglaom ...
may paglaom ...
nagaharakhak!
