Prinsesa Kang Mga Agalon
by Ulysses Viriña Espartero
22 Hulyo 2012
Daw sa istorya run lang mabatian
ang mga
Japayuki
nga nagbaid, nagpatarom
kang samurai, katana kag showato
kang emperor kag ang ana mga kampon
sa Japan
kabaylo kang pilak.
Bruneiyuki
nga nagpatarawis, nagpabaskog
kang bongkok
kang sultan kag ang ana mga uripon
sa Brunei
kabaylo kang bulawan.
sa kadya nga panahon,
ginapukaw nga daw bangungot lamang
ang mga inagyan
(matood man ukon bukon)
kang mga artista nga sanday
Ruffa Guttierez, Rosanna Roces
Gretchen Barreto kag Maritoni Fernandez.
Bangungot nga padayon nga ginadamgo
kang mga Pinay nga naduraan kang animo
sa disyerto kang mga Arabo
Mga babayi nga makusog,
nakikipagbato, maisog ang boot
sa pagsuksok kang itom nga abaya
kag magtaklob sa ulo kag dahi kang shila.
Sa Arabya,
wara’t agahon, wara’t gabi-i
wara man kang entablado
basta padayon ang pagsayaw
kang mga bag-ong prinsesa
kang mga agalon
kabaylo ang paglaom
nga magkaya-kaya sa palasyo.
