Ikaw Ang Mansanas
by Ulysses Viriña Espartero
23 Hulyo 2012
Kadton ko ikaw nga bilog
pareho kang pula-pula nga mansanas
sa akon paminsaron kag pamatyag
bilog, gapitik ang akon tagiposoon sa
imong kanamit.
Indi ko ikaw pagkiwaon
ukon ipusdak sa tapalan
kag lapdusan
kang toktokon nga kutsilo
hay gusto ko ikaw kaptan
nga bilog
kag puga-pugaon
himashimason kang
nagakurog ko
nga alima.
Sa akon pagginhawa
handom ko ikaw liwat nga angkabon
maskin matig-a
sa akon pagtiraw kanimo
nasudlan
ang busong ko.
