Mangin Alibangbang
by Ulysses Viriña Espartero
23 Hulyo 2012
Sugti ako
nga maghumlad
kang akon pakpak
pareho kang alibangbang
sa Al Majas Park
Gusto ko maglupad
makupkupan kang
mainit nga hangin
nga ginabuga
kang disyerto
Gusto ko maghado
makatungtong
makapahuway
makaturog
makasaot-saot
sa ibabaw kang
dusngal nga baba kang
Cattleya.
Kag sa akon nga pagpaila-ila
kang akon de kolores nga hitsura
kag sa pag iwol-iwol
kang akon matambok nga lawas
ang mga turista
naglagsanay
sa pagbuol kang akon laragway
nga nagatungtong
sa paghumlad
kag pagnganga kang
iba pa nga bulak.
Gusto ko mangin alibangbang.
Gusto ko ikaw
magaparapit
magalagas
kanakon.
