ni Roman A. Dela Cruz
ginsaylo sa Kinaray-a ni Ulysses V. Espartero
24 Enero 2011
Tatay, nagmuromuro si Nanay
Nga hubas run ang aton nga taragbasan
Ang imo gin-uli sa pagpamanday
Basi buhinan mo pa para sa simbahan.
Kulang pa sa amon ang imo nga kinita
Nahawag gid takun, Tatay, basi mataman kaw
Kanugon kun wara kang kamatuoran
Ang imo ginatoohan.
Pabay-i lang Toto.
Ang tubi nga nagailig palawod
Mabalik man gihapon paagi sa uran.
Wara kang pagwasi, wara kang pag-uyang.
Kun bukon kang matood ang akon ginatoohan,
Ano gid man
Basta matuman ko ang hutik kang dughan.
-a translation of "Ano Gid Man" originally written in the Aklanon language by Roman A. dela Cruz.
