Bukon Ako Kang Celfon
by Ulysses Espartero
24 Hulyo 2012
Wara ako matingala
nga matapos mo ako
piripindoton
para mabuslan kang kasadya
ang imo kaluya,
gamiton sa tawag
kang imo kinahanglanon
nga kalipay
kag ihulid kang pira ka bulan
sa hirigdaan,
sangka kablit mo lang
indi mo run ako pagsarasapdingon
sa pagguwa kang IPhone.
Baw Ontoy,
bukon ako kang daan nga celfon
nga tapos magburuglag
nag-irikison
ang akon lawas
imo lang ako pabay-an
sa binit nagakalhit.
Man-an ko nga nahuya kaw nga
bitbition ako kag isulod sa
Levi’s mo nga pantalon
ako bala dapat man mahuya,
nga sa tapos mo pagahimuslan
himashimason ang akon casing
maskin akon nga baterya
di run maggana.?
Tawo kaw gid man
kag ako sa imong
panan-awan
celfon
lang.
